Göydəniz Qəhrəmanov: “Kəlbəcər Qafqazın aparıcı sağlamlıq turizmi mərkəzlərindən birinə çevriləcək”

“Kəlbəcər Azərbaycanın təbiət incilərindən biri olmaqla yanaşı, həm də ölkəmizin təhlükəsizliyində xüsusi yeri olan bir bölgədir. Bu ərazinin strateji-coğrafi mövqeyi onu tarixin bütün dövrlərində həm siyasi, həm də hərbi baxımdan mühüm bölgələrdən biri etmişdir. Kəlbəcər Azərbaycanın ən yüksək dağ rayonudur — Camışdağ və Dəlidağ kimi zirvələri ilə ölkənin təbii səddini təşkil edir və bu baxımdan həm müdafiə xətti, həm də regionun ekoloji tarazlığı üçün mühüm əhəmiyyət daşıyır. İşğala qədər 53 mindən çox əhalisi, 145 kəndi və onlarla inzibati dairəsi olan Kəlbəcər uzun illər ərzində iqtisadi və mədəni baxımdan dinamik inkişaf edən bir rayon olmuşdur. Lakin Ermənistanın işğal siyasəti nəticəsində bu inkişaf bir anda dağıdıldı, yer üzündən silinən kəndlərin, məhv edilən infrastrukturun acı izləri illərlə yaddaşlarda qaldı.”

Bu sözləri aia.az-a Kəlbəcər şəhəri günü ilə əlaqədar verdiyi açıqlamasında millət vəkili Göydəniz Qəhrəmanov deyib.
       
Daha sonra deputat rayonun işğal dövründən bəhs edərək bildirib ki, 1993-cü ildə Kəlbəcərin erməni silahlı qüvvələri tərəfindən zəbt olunması təkcə yerli sakinlər üçün deyil, bütün Azərbaycan üçün ağrılı hadisə oldu: “ İşğal nəticəsində on minlərlə insan öz doğma yurd-yuvasından didərgin düşdü, kəndlər, mədəniyyət ocaqları, məktəblər, xəstəxanalar, kitabxanalar və yüzlərlə yaşayış evi talan edilərək yandırıldı. İşğal dövründə ermənilərin həyata keçirdiyi qeyri-qanuni məskunlaşdırma siyasəti beynəlxalq hüququn bütün normalarına zidd idi və BMT Təhlükəsizlik Şurasının 822 saylı Qətnaməsi də görməzlikdən gəlinirdi. Lakin nə Azərbaycan dövləti, nə də Azərbaycan xalqı heç vaxt haqsızlıqla barışmadı. Vətən müharibəsi zamanı Azərbaycan Ordusu Kəlbəcərin şimal hissəsində mühüm strateji yüksəklikləri ələ keçirərək düşmənin Basarkeçər–Kəlbəcər yolundan istifadə imkanlarını tamamilə məhdudlaşdırdı. Bu uğurlar erməni ordusunu iflic vəziyyətinə saldı və müharibənin taleyinin müəyyənləşməsində həlledici rol oynadı. Məhz bu strateji üstünlüklər 10 noyabr 2020-ci il Üçtərəfli Bəyanatında Kəlbəcərin tam və qeyd-şərtsiz Azərbaycana qaytarılmasına yol açdı. Bu gün Kəlbəcər tamamilə yeni dövrün astanasındadır. Cənab Prezident İlham Əliyevin rəhbərliyi ilə bölgədə aparılan genişmiqyaslı quruculuq işləri Kəlbəcərin gələcəyini müasir, dayanıqlı və inteqrasiya olunmuş inkişaf modeli üzərində formalaşdırır. Zar, Zallar və Yanşaq kəndlərində yüzlərlə ailə üçün nəzərdə tutulan fərdi yaşayış evləri, məktəblər, uşaq bağçaları, sosial infrastruktur və abadlıq layihələri bölgənin yeni simasını yaradır. Kəlbəcər şəhərində inşa edilən 524 ailəlik yaşayış kompleksi isə bu rayonun müasir şəhərsalma nümunəsinə çevrilməkdədir. Eyni zamanda, Toğanalı–Kəlbəcər–İstisu avtomobil yolunun 87 faizinin tamamlanması və dünyanın ən uzun tunellərindən biri olan Murovdağ tunelinin tikintisi bölgənin strateji iqtisadi əhəmiyyətini daha da artırır. “İstisu” mineral su zavodu və tikilməkdə olan Müalicə-İstirahət Kompleksi isə gələcəkdə Kəlbəcəri Qafqazın aparıcı sağlamlıq turizmi mərkəzlərindən birinə çevirəcək. Bütün bu layihələr göstərir ki, 25 noyabr Kəlbəcərin tarixində dönüş nöqtəsi olmaqla yanaşı, həm də onun yeni həyatının başlanğıcıdır” – deyə, Göydəniz Qəhrəmanov fikirlərini başa çatdırıb.