Pənah Babayev: Tarixi Qələbə və milli həmrəyliyin təntənəsi

Abşeron rayonunun Mehdiabad qəsəbə 1 nömrəli tam orta məktəbinin direktoru Pənah Babayev -  Azərbaycan xalqının tarixində elə günlər var ki, zaman keçdikcə öz əhəmiyyətini daha da artırır, milli yaddaşımızda qürur və qəhrəmanlıq rəmzi kimi əbədi yaşayır. 8 Noyabr – Şuşa Şəhəri Günü məhz belə əlamətdar tarixlərdəndir. Bu gün xalqımızın milli iradəsinin, sarsılmaz birliyinin, Vətənə sonsuz məhəbbətinin və qəhrəmanlıq salnaməsinin təntənəsidir. Şuşanın azadlığı Azərbaycanın tarixində yeni bir mərhələnin başlanğıcı, milli qürurumuzun və tarixi yaddaşımızın bərpası deməkdir.
2020-ci il noyabrın 8-də Şuşanın işğaldan azad edilməsi xəbəri bütün ölkədə böyük sevinc və qürur hissi ilə qarşılandı. Bu xəbər illərlə Şuşanın həsrəti ilə yaşayan insanların arzularının gerçəkləşməsi, xalqımızın milli iradəsinin təntənəsi idi. Şuşanın azad olunması Vətən müharibəsinin gedişində həlledici əhəmiyyət daşıdı və Azərbaycanın hərb tarixinə qızıl hərflərlə yazıldı.
Şuşanın azadlığı Azərbaycan əsgərinin qəhrəmanlığının, peşəkarlığının və Vətən sevgisinin parlaq təzahürü oldu. Mürəkkəb relyef və çətin döyüş şəraitində aparılan əməliyyatlar hərb tariximizdə özünəməxsus yer tutdu. Bu Qələbə şəhidlərimizin canı, qazilərimizin fədakarlığı və xalqımızın sarsılmaz birliyi hesabına əldə edildi. Bu gün hər bir azərbaycanlı Şuşanın azadlığı ilə fəxr edir, Vətən uğrunda canından keçən qəhrəmanlarımızın xatirəsini dərin ehtiramla yad edir.
Şuşanın azad edilməsindən sonra şəhərdə genişmiqyaslı bərpa və quruculuq işlərinə başlanıldı. Tarixi abidələrin, məscidlərin, muzeylərin, mədəniyyət ocaqlarının bərpası, infrastrukturun yenilənməsi və yeni sosial obyektlərin yaradılması istiqamətində mühüm layihələr həyata keçirilir. Şəhərin tarixi simasının qorunması və əvvəlki şöhrətinin bərpası dövlət siyasətinin əsas istiqamətlərindən biridir.
8 Noyabr – Şuşa Şəhəri Günü xalqımızın Zəfər ruhunun, sarsılmaz birliyinin və Vətən sevgisinin təntənəsidir. Bu əlamətdar gün bizə azadlığın necə böyük nemət olduğunu, Vətən uğrunda mübarizənin və milli həmrəyliyin əhəmiyyətini xatırladır. Şuşanın azadlığı uğrunda canlarından keçən şəhidlərimizin əziz xatirəsi daim qəlbimizdə yaşayacaq, qazilərimizin qəhrəmanlığı heç zaman unudulmayacaq.
Şuşanın Zəfər şəhəri və mədəniyyət paytaxtı kimi əhəmiyyəti Azərbaycançılıq ideologiyası ilə də sıx bağlıdır. Çünki azərbaycançılıq xalqımızın milli kimliyini, tarixi irsini, dilini, mədəniyyətini və dövlətçilik ənənələrini qorumağı əsas dəyərlərdən biri hesab edir. Şuşa bu dəyərlərin canlı təcəssümüdür. Onun tarixi keçmişi, zəngin mədəni irsi və azadlıq salnaməsi gələcək nəsillərə Vətənə bağlılıq, milli qürur və dövlətə sədaqət nümunəsi aşılayır.
Şuşa Azərbaycanın dünəni, bu günü və gələcəyidir. Bu qədim şəhər xalqımızın milli qürurunun, mədəni zənginliyinin və sarsılmaz iradəsinin əbədi rəmzidir.