Bakı və Brüssel arasında mühüm əlaqələr qurulmaqdadır

Azərbaycan hər zaman xarici ölkələrlə, beynəlxalq və regional təşkilatlarla bərabərhüquqlu tərəfdaşlığa əsaslanan münasibətlərin inkişafında maraqlı olub. Təbii ki, ölkəmizin Avropa İttifaqı ilə münasibətləri də bu prinsip əsasında inkişaf edib. Ölkəmizin qitənin enerji təhlükəsizliyində oynadığı həlledici rol və regionda yaratdığı yeni geosiyasi reallıqlar Bakını Brüssel üçün əvəzolunmaz tərəfdaşa çevirib. Bu kontekstdə, 11 mart 2026-cı il tarixində Avropa İttifaqı Şurasının Prezidenti Antonio Koştanın Azərbaycana rəsmi səfəri ikitərəfli münasibətlərin inkişafında yeni və strateji bir səhifə açmışdır.
Avropa İttifaqı son illər ərzində itirdiyi mövqeləri geri qaytarmağa çalışır. Bu mənada, Aİ regionda Rusiya təsirinin balanslaşdırılmasına, İranın regional təzyiq imkanlarının məhdudlaşdırılmasına, “Qlobal Qapı” təşəbbüsü və Orta Dəhliz vasitəsilə Qara dəniz, Cənubi Qafqaz və Mərkəzi Asiya arasında nəqliyyat, ticarət, enerji, investisiya və rəqəmsallaşma sahələrində əlaqələrin gücləndirilməsinə çalışır. Məhz, bu kontekstdə Azərbaycanın Şərq-Qərb nəqliyyat marşrutunun əsas halqası olması, Türkiyə və Mərkəzi Asiya ilə Avropa arasında körpü rolunu oynaması Aİ-nin Bakı ilə əməkdaşlığını yalnız enerji deyil, həm də geosiyasi və geoiqtisadi əlaqələr baxımından da strateji xarakterli edir. Bir sözlə, Antonio Koştanın Bakıya səfəri onu göstərir ki, Azərbaycan artıq Avropa üçün enerji təhlükəsizliyi tərəfdaşı, Avropa-Asiya logistika qovşağı və regional təhlükəsizlik aktoru kimi əsas funksiyaları yerinə yetirir. Bu da Azərbaycanın geosiyasi rolunun regional dövlətdən strateji tərəfdaş səviyyəsinə yüksəldiyini göstərir. Ona görə də, orta və uzunmüddətli perspektivdə Aİ-nin Cənubi Qafqaz siyasətini aktivləşdirəcəyi, bu xüsusda Aİ-Azərbaycan enerji əməkdaşlığının daha da genişlənəcəyi, Orta Dəhliz layihəsinin, həmçinin TRIPP-in icrası üzrə davam edən səylərlə bağlı Azərbaycanla əməkdaşlığı sürətləndirəcəyi, Azərbaycanın böyük investisiya zonasına çevriləcəyi, Azərbaycan-Aİ münasibətlərinin strateji tərəfdaşlıq səviyyəsinə yüksələcəyi proqnozlaşdırılır. Həmçinin, Azərbaycan-Avropa İttifaqı münasibətlərində yeni mərhələnin başlanğıcı kimi qiymətləndirilən bu səfərin nəticəsi olaraq, enerji, logistika, təhlükəsizlik və texnologiya sahələrində əməkdaşlığın genişlənməsi ilə Azərbaycanın Avropa ilə əlaqələri daha da güclənəcək və ölkəni Avrasiya geoiqtisadi sistemində əsas strateji qovşaqlardan birinə çevirəcək.
Bu səfər sadəcə diplomatik bir protokol deyil, həm də Avropanın Azərbaycana olan etimadının növbəti nümayişidir. Azərbaycan 44 günlük Vətən müharibəsində qazandığı tarixi Qələbə ilə regionda yeni reallıq yaradıb. Artıq hər kəs görür və qəbul edir ki, Azərbaycanın razılığı və iştirakı olmadan regionda hər hansısa bir layihəni reallaşdırmaq mümkün deyil. Buna görə də müxtəlif dövlətlər, beynəlxalq və regional təşkilatlar heç bir tərəddüd etmədən Azərbaycan ilə əməkdaşlığa can atır. Təbii ki, ötən illər ərazində ölkəmizin yaratdığı beynəlxalq əməkdaşlıq platforması bu gün Azərbaycanın regionda yaratdığı yeni reallıqlara uyğun şəkildə əməkdaşlığı daha da inkişaf etdirməyə imkan yaradıb.

Vüqar Musayev-YAP Sabunçu rayon təşkilatının məsləhətçisi