Eltun Süleymanov: "Azərbaycanla Avropa İttifaqı münasibətlərində yeni dinamika başlayır"

Martın 11-də Bakıda Azərbaycan Respublikasının Prezidenti cənab Ilham Əliyev ilə Avropa İttifaqı Şurasının Prezidenti António Costa arasında keçirilən görüş və sonrasında səsləndirilən bəyanatlar iki tərəf arasında münasibətlərin strateji əhəmiyyətini bir daha nümayiş etdirdi. Cənab Prezident İlham Əliyevin çıxışı həm diplomatik mesajlar, həm də regional və qlobal siyasi kontekst baxımından diqqətəlayiq məqamlarla zəngin idi.

Bu sözləri aia.az-a açıqlamasında Eltun Süleymanov deyib.

Müsahibimiz onu da deyib ki, dövlət başçısı çıxışında Avropa İttifaqı Şurasının Prezidentini Bakıda qəbul etməkdən məmnunluğunu ifadə etməklə yanaşı, tərəflər arasında davamlı siyasi dialoqun mövcudluğunu vurğuladı. Son bir il ərzində iki lider arasında bir neçə görüşün baş tutması və Avropa Komissiyası nümayəndələrinin Azərbaycana mütəmadi səfərləri göstərir ki, Bakı ilə Brüssel arasında əməkdaşlıq getdikcə daha intensiv xarakter alır. Bu dinamika yalnız diplomatik münasibətlərin formal səviyyədə deyil, real siyasi gündəlik üzərində qurulduğunu göstərir. Prezident İlham Əliyevin sözlərinə görə, qarşılıqlı səfərlər və müzakirələr tərəfdaşlığın daha da dərinləşməsi üçün möhkəm zəmin yaradır. Cənab Prezidentin çıxışında iqtisadi əlaqələrə xüsusi yer ayrıldı. Statistik göstəricilərə əsasən, bu ilin yanvar ayında Azərbaycanın xarici ticarətinin yarıdan çoxu Avropa İttifaqı ilə əlaqəli olub. Bu fakt Brüsselin ölkə iqtisadiyyatında aparıcı tərəfdaşlardan biri olduğunu açıq şəkildə göstərir. Azərbaycan yalnız enerji ixrac edən ölkə kimi deyil, həm də Avropa iqtisadi məkanında investisiya layihələrinə qoşulan tərəfdaş kimi çıxış edir. Qarşılıqlı sərmayə qoyuluşu və yeni layihələrin reallaşdırılması tərəflər arasında iqtisadi inteqrasiyanın daha da genişlənəcəyinə işarə edir. Azərbaycan ilə Avropa İttifaqı arasındakı münasibətlərin ən mühüm istiqamətlərindən biri enerji sektorudur. Cənab Prezident İlham Əliyev çıxışında qeyd etdi ki, enerji sahəsində əməkdaşlıq uzun illərdir tərəfdaşlığın əsas sütunlarından biridir və bu istiqamət gələcəkdə də prioritet olaraq qalacaq. Xüsusilə 2022-ci ildə Avropa Komissiyası ilə imzalanmış strateji enerji tərəfdaşlığı sənədindən sonra Azərbaycan qazının Avropa bazarına çıxışı daha da genişlənib. Bu gün Avropa İttifaqının on üzv dövləti Azərbaycandan qaz alır və ümumilikdə 16 ölkə Azərbaycan qazından istifadə edir. Bu göstərici Azərbaycanın Avropa enerji təhlükəsizliyində artan rolunu nümayiş etdirir. Dövlət başçısı qeyd etdi ki, yeni yataqların istismara verilməsi hesabına yaxın illərdə qaz hasilatının əhəmiyyətli dərəcədə artırılması planlaşdırılır.

Cənab Prezident İlham Əliyev çıxışında bərpaolunan enerji sahəsində görülən işlərə də geniş toxundu. Azərbaycan günəş, külək və su elektrik enerjisi sahələrində böyük potensiala malik ölkələrdən biridir. Dövlət başçısının sözlərinə görə, yaxın beş-altı il ərzində ölkə ixrac üçün 6–8 giqavat həcmində yaşıl enerji istehsal etmək niyyətindədir. Xəzər regionunun təbii imkanları bu planların reallaşmasına geniş perspektiv açır. Günəşli və küləkli günlərin çoxluğu alternativ enerji layihələrinin inkişafı üçün əlverişli şərait yaradır. Bu isə Azərbaycanın gələcəkdə Avropanın yaşıl enerji bazarında mühüm tərəfdaşlarından birinə çevrilə biləcəyini göstərir. Cənab Prezident İlham Əliyevin bəyanatında regional nəqliyyat layihələri də xüsusi yer tutdu. Xüsusilə Orta Dəhlizin genişləndirilməsi Avropa ilə Asiya arasında ticarət əlaqələrinin inkişafında yeni imkanlar yaradır. Azərbaycan bu layihə vasitəsilə qlobal logistika xəritəsində daha mühüm mövqe qazanır. Enerji və yük daşımalarının bu marşrut üzərindən həyata keçirilməsi həm regionun iqtisadi potensialını artırır, həm də Avropa üçün alternativ tranzit imkanları yaradır. Cənab Prezident İlham Əliyev çıxışında Ermənistanla sülh prosesinə də toxundu. Onun sözlərinə görə, uzun illər davam edən münaqişədən sonra regionda sülh mühitinin formalaşması yeni əməkdaşlıq imkanları açır. Azərbaycan artıq Ermənistana neft məhsullarının çatdırılmasına başlayıb və digər ölkələrdən gələn yüklərin Azərbaycan ərazisi vasitəsilə Ermənistana tranziti üçün bütün məhdudiyyətlər aradan qaldırılıb. Bu addımlar regionda etimadın formalaşdırılması istiqamətində mühüm jest kimi qiymətləndirilir. Dövlətimizi başçısı vurğuladı ki, sülh yalnız imzalanmış sənədlərlə deyil, real addımlar və praktiki əməkdaşlıq vasitəsilə möhkəmlənir.

Bakıda keçirilən görüş və səsləndirilən bəyanatlar göstərir ki, Azərbaycan ilə Avropa İttifaqı arasında münasibətlər yeni inkişaf mərhələsinə qədəm qoyur. Enerji təhlükəsizliyi, ticarət, yaşıl enerji layihələri və nəqliyyat dəhlizləri kimi istiqamətlər bu tərəfdaşlığın əsas sütunlarını təşkil edir. Cənab Prezident İlham Əliyevin çıxışı bir daha nümayiş etdirdi ki, Azərbaycan regional sabitliyin möhkəmlənməsi, iqtisadi əməkdaşlığın genişlənməsi və Avropa ilə strateji tərəfdaşlığın dərinləşdirilməsi istiqamətində fəal siyasət yürüdür-deyə E. Süleymanov fikrini tamamlayıb.