Azərbaycanda dövlət qadın siyasətinin sistemli və məqsədyönlü şəkildə formalaşdırılması Ümummilli Lider Heydər Əliyevin adı ilə bağlıdır

Azərbaycan qadını tarix boyu yalnız ailənin dayağı deyil, eyni zamanda cəmiyyətin, dövlətin və milli-mənəvi dəyərlərin qoruyucusu olmuşdur. Qədimdən bu günə qədər Azərbaycan qadını müdrikliyi, fədakarlığı, iradəsi və vətənpərvərliyi ilə seçilmiş, ictimai-siyasi və mədəni həyatın bütün mərhələlərində fəal iştirak etmişdir. 8 Mart – Beynəlxalq Qadınlar Günü isə bu böyük və şərəfli yolun bir daha dəyərləndirilməsi, qadın əməyinə və nüfuzuna verilən yüksək qiymətin ifadəsidir.Azərbaycan tarixinin müxtəlif dövrlərinə nəzər saldıqda qadınların cəmiyyət həyatında mühüm yer tutduğunu aydın şəkildə görürük. Tomris, Sara xatun, Natəvan kimi qadınlar yalnız tarixi şəxsiyyətlər deyil, eyni zamanda milli yaddaşımızın simvollarıdır. Azərbaycan qadını müəllim, həkim, yazıçı, alim kimi formalaşaraq cəmiyyətin inkişafında aparıcı qüvvəyə çevrilmişdir.
1918-ci ildə yaradılmış Azərbaycan Xalq Cümhuriyyəti yalnız Şərqdə deyil, bir çox Qərb ölkələrindən də əvvəl qadınlara seçmək və seçilmək hüququ verməklə dünya tarixində mühüm bir addım atmışdır. Bu tarixi qərar Azərbaycan cəmiyyətinin nə qədər demokratik, mütərəqqi və bərabərlik prinsiplərinə sadiq olduğunu sübut etmişdir.Bu hüquq Azərbaycan qadınının cəmiyyətin tamhüquqlu üzvü kimi tanınmasının, onun siyasi və ictimai həyatda rolunun rəsmən təsdiqinin bariz nümunəsi idi. Qadınların dövlət idarəçiliyində, qanunvericilik proseslərində iştirak etməsi məhz həmin dövrdən etibarən dövlətçilik ənənəmizin ayrılmaz hissəsinə çevrilmişdir.
Azərbaycanda dövlət qadın siyasətinin sistemli və məqsədyönlü şəkildə formalaşdırılması Ümummilli Lider Heydər Əliyevin adı ilə bağlıdır. Onun rəhbərliyi dövründə qadınların ictimai-siyasi həyatda fəallığının artırılması, onların hüquqlarının qorunması dövlət siyasətinin əsas istiqamətlərindən birinə çevrilmişdir.Qadınların dövlət idarəçiliyində təmsil olunması, elm, təhsil, mədəniyyət və iqtisadi sahələrdə irəliləməsi üçün hüquqi və institusional baza məhz Heydər Əliyev tərəfindən yaradılmışdır. O, qadını cəmiyyətin inkişafının əsas aparıcı qüvvələrindən biri kimi dəyərləndirmişdir.
Bu gün Azərbaycanda dövlət qadın siyasəti Prezident İlham Əliyev tərəfindən müasir çağırışlara uyğun şəkildə uğurla davam etdirilir.Qadınların parlamentdə, icra strukturlarında, təhsil və səhiyyə sahələrində geniş təmsil olunması ölkədə gender bərabərliyinin real nəticələr verdiyini göstərir. Bu siyasət Azərbaycan qadınının potensialının tam reallaşdırılmasına xidmət edir.8 Mart – Beynəlxalq Qadınlar Günü təkcə bayram deyil, Azərbaycan qadınının tarixdə və bu gün cəmiyyətdə tutduğu mövqeyin dərin mənalı ifadəsidir. Azərbaycan qadını dünən olduğu kimi bu gün də ölkənin inkişafında, dövlətçiliyin möhkəmlənməsində, milli dəyərlərin qorunmasında mühüm rol oynayır.

Maştağa qəsəbəsi, 293 saylı tam orta məktəbin
Coğrafiya müəllimi Mail Kərimov