Süni intellektin tətbiqi dövlət qurumlarında geniş vüsət almalıdır

Müasir dövrdə rəqəmsal transformasiya dövlət idarəçiliyinin əsas prioritet istiqamətlərindən birinə çevrilmişdir. İnformasiya texnologiyalarının sürətli inkişafı, böyük həcmli məlumatların toplanması və emalı imkanlarının artması dövlət qurumlarının fəaliyyətində yeni yanaşmalar tələb edir. Bu baxımdan süni intellektin tətbiqi dövlət qurumlarında səmərəliliyin artırılması, şəffaflığın gücləndirilməsi və vətəndaş məmnunluğunun yüksəldilməsi üçün mühüm əhəmiyyət daşıyır.
Prezident İlham Əliyev “Azərbaycanın yeni rəqəmsal arxitekturası”na həsr olunmuş müşavirədə bildirib ki, inkişaf etmiş bəzi ölkələrdə dövlət məmurlarının gündəlik fəaliyyətinə də süni intellekt agentləri, - belə adlandırılır, - kömək göstərir: "Çünki burada hər hansı bir qərarın düzgün olub-olmaması ilə bağlı süni intellekt təbii ki, yardımçı ola bilər. Ona görə bu sistemə də baxmaq lazımdır və rəhbər orqanlarında təmsil olunan şəxslər süni intellektdən geniş istifadə etməlidirlər.Özəl sektora gəldikdə, burada eyni yanaşmanı təmin etmək üçün dəstək mexanizmləri işlənməlidir. Biz özəl sektora bu sahədə hansı formada daha böyük diqqət göstərilməsini təşviq edə bilərik, bu barədə də təkliflər veriləcək".
Dövlət başçısı onu da qeyd edib ki, kibertəhlükəsizlik üzrə əsas hədəflər müəyyən edilməlidir:
"Bu sahə də kritik sahələrdən biridir. Biz keçən il çox mütəşəkkil və aqressiv kiberhücuma məruz qalmışıq. Biz onun mənbəyini də bilirik və lazımi tədbirlər də görülmüşdür ki, özümüzü bu ciddi problemlərdən qoruya bilək. Ona görə bu sahəyə ciddi diqqət göstərilməlidir. Bizdə artıq fəaliyyət göstərən Kibertəhlükəsizlik Mərkəzi var, onun işi daim diqqət mərkəzində olmalıdır".
Prezident müşavirədə dövlət qurumlarının müxtəlif mobil tətbiqlərinin tədricən ləğv ediləcəyini və bütün xidmətlərin “mygov” platformasında vahid mərkəzdən təqdim olunacağını da bildirib.