Prezident İlham Əliyev Əbu-Dabidə: “Uzunmüddətli münaqişəyə baxmayaraq, sülh mümkündür”

Fevralın 4-də Əbu-Dabidə “Zayed İnsan Qardaşlığı Mükafatı”nın təqdimolunma mərasimində çıxış edən Azərbaycan Prezidenti İlham Əliyev həm mükafatın rəmzi əhəmiyyətindən, həm də Azərbaycan–Ermənistan münasibətlərində başlanmış yeni sülh dövründən ətraflı danışıb. Dövlət başçısı münaqişədən sonra yaranmış reallıqları qiymətləndirərək vurğulayıb ki, uzun illər davam edən qarşıdurma və etimadsızlıq fonunda belə sülh mümkündür.
Prezident İlham Əliyev çıxışına “Zayed İnsan Qardaşlığı Mükafatı”na layiq görülməsinə görə münsiflər heyətinə təşəkkür etməklə başlayıb. Dövlət başçısı bu mükafatın Birləşmiş Ərəb Əmirliklərinin banisi, mərhum Şeyx Zayedin adını daşımasının xüsusi rəmzi məna kəsb etdiyini vurğulayıb:
“Birləşmiş Ərəb Əmirliklərinin banisi, mərhum Şeyx Zayedin adını daşıyan bu mükafata layiq görülmək mənim üçün böyük şərəfdir. O, elə bir böyük lider idi ki, onun uzaqgörənliyi və fəaliyyəti BƏƏ-ni dünyanın ən firavan və ən uğurlu ölkələrindən birinə çevirmişdir.”
Prezident, Şeyx Zayedin siyasi irsinin bu gün də regionda sabitlik, inkişaf və tərəqqi üçün nümunə olduğunu bildirib.
Çıxışında Birləşmiş Ərəb Əmirliklərinin bu günkü inkişaf modelini də yüksək qiymətləndirən İlham Əliyev qeyd edib ki, Prezident Şeyx Məhəmməd bin Zayed atasının inkişaf, tərəqqi və davamlı müasirləşmə siyasətini uğurla davam etdirir:
“Bu gün Birləşmiş Ərəb Əmirlikləri tarixi köklərinə möhkəm bağlı qalmaqla yanaşı, gələcəyə də inamla baxan, sülh və ahəngdar şəraitdə yaşayan bir cəmiyyətin necə qurulması baxımından həqiqətən də bir çox ölkələr üçün nümunədir.”
Onun sözlərinə görə, Əmirliklərin modeli həm milli-mənəvi dəyərlərə sadiqliyi, həm də modern dövlət quruculuğunu birləşdirdiyi üçün dünya miqyasında diqqət mərkəzindədir.
Prezident İlham Əliyev çıxışının əsas hissəsini Azərbaycan və Ermənistan arasında əldə olunmuş sülh prosesinə həsr edib. O, 30 ildən artıq davam edən münaqişə və gərginlikdən sonra regionda yeni reallığın yarandığını xatırladaraq deyib:
“Biz 30 ildən artıq müddətdə müharibə şəraitində olmuşuq. İndi isə artıq altı aydır ki, sülh şəraitində yaşayırıq. Dəfələrlə qeyd etdiyim kimi, biz sülh şəraitində yaşamağı öyrənirik. Sizə deyə bilərəm ki, bu, xüsusi bir hissdir. Biz müstəqillik əldə edəndən bəri heç vaxt sülh şəraitində yaşamamışıq və indi bunu sürətlə öyrənirik.”
Dövlət başçısı vurğulayıb ki, ABŞ Prezidenti Donald Trampın ev sahibliyi etdiyi Vaşinqton Zirvə Görüşündən sonrakı altı ay tərəfdaşlıq, əməkdaşlıq və uzunmüddətli, dayanıqlı sülhə doğru irəliləyiş dövrü olub.
2025-ci il avqustun 8-də Vaşinqtonda keçirilən üçtərəfli Zirvə Görüşü nəticəsində Ermənistan və Azərbaycan arasında sülh sazişi paraflanıb, eyni zamanda Birgə Bəyannamə imzalanıb.

Prezident İlham Əliyev ABŞ Prezidenti Donald Trampın Ermənistan–Azərbaycan sülh prosesinə töhfəsini xüsusi qeyd edib:
“Azərbaycan və Ermənistan arasında sülhün bərqərar olunmasına verdiyi töhfəyə görə Amerika Birləşmiş Ştatlarının Prezidenti Donald Trampa da minnətdarlığımı bildirmək istəyirəm.”
Prezident xatırladıb ki, 2025-ci il avqustun 8-də Vaşinqtonda keçirilən üçtərəfli Zirvə Görüşü nəticəsində Ermənistan və Azərbaycan arasında sülh sazişi paraflanıb, eyni zamanda Birgə Bəyannamə imzalanıb. Prezident Trampın həmin sənədləri şahid qismində imzalaması ilə üç onillikdən artıq davam edən qanlı münaqişəyə siyasi nöqtə qoyulub.
Çıxışında Prezident İlham Əliyev sülhdən sonrakı altı ay ərzində iki ölkə arasında başlanmış praktiki əməkdaşlıqdan da danışıb. Onun sözlərinə görə, bu dövrdə atılan addımlar münasibətlərin normallaşmasının real məzmunla doldurulduğunu göstərir:
“Biz təkcə Azərbaycan ərazisindən Ermənistana yük daşımalarına qoyulmuş məhdudiyyətləri aradan qaldırmadıq, eyni zamanda, Ermənistana neft məhsullarının ixracına da başladıq. Yəni bu altı ay ərzində biz əməkdaşlığa başlamışıq. Hazırda ticarət əlaqələrimizi genişləndiririk.”
Prezident əlavə edib ki, Əbu-Dabiyə səfəri çərçivəsində erməni həmkarı ilə görüşərək gələcək addımlar, xüsusilə iqtisadi və nəqliyyat sahələrində əməkdaşlığın daha da genişləndirilməsi məsələlərini müzakirə edib.
Mükafatın mahiyyətinə uyğun olaraq prezident İlham Əliyev çıxışında dinlərarası dialoqun və mədəniyyətlərarası anlaşmanın təşviqi istiqamətində mühüm rol oynayan dini liderlərə də təşəkkür edib. O, Əl-Əzhərin böyük imamı, doktor Əhməd Əl-Tayyibin və Roma Papası, Zati-müqəddəsləri Leoya dinlərarası dialoqa, sivilizasiyalararası yaxınlaşmaya verdikləri töhfələrə görə minnətdarlığını bildirib.
Prezident həmçinin onların, eləcə də digər qlobal liderlərin çıxışlarında Azərbaycan–Ermənistan sülhünün əhəmiyyətinin bir daha vurğulanmasını xüsusi qeyd edib və bunun beynəlxalq ictimaiyyətin sülhə dəstəyinin göstəricisi olduğunu deyib.
Çıxışının ən mühüm mesajlarından birini Prezident İlham Əliyev belə ifadə edib:
“Mən hesab edirəm ki, bizim nümunəmiz öyrənilməli və hələ də müharibə vəziyyətində olanlar üçün yol xəritəsi kimi istifadə edilməlidir. Bizim nümunəmiz göstərir ki, uzunmüddətli münaqişəyə, əzablara və qarşılıqlı etimadsızlığa baxmayaraq, sülh mümkündür. Hər iki tərəfdən güclü siyasi iradə mövcud olduğu və həmin proses dost ölkələr və beynəlxalq ictimaiyyət tərəfindən dəstəkləndiyi halda, sülh mümkündür.”
O, Azərbaycanın və Ermənistanın qarşılıqlı etimadın bərpası, kommunikasiya xətlərinin açılması və iqtisadi inteqrasiya istiqamətində atdığı addımları digər münaqişə bölgələri üçün praktiki model kimi dəyərləndirib.
Prezident İlham Əliyev qeyd edib ki, mərasimin məhz Əbu-Dabidə keçirilməsi də simvolik mənaya malikdir. Belə ki, Ermənistan ilə Azərbaycan arasında sonuncu danışıqlar raundu ötən ilin iyulunda məhz BƏƏ paytaxtında baş tutmuş, qardaş ölkənin Prezidenti Şeyx Məhəmmədin dəstəyi ilə sülhün əsas şərtləri burada razılaşdırılmışdı:
“Bu mərasim rəmzi məna daşıyır. Çünki Ermənistan ilə Azərbaycan arasında sonuncu danışıqlar raundu ötən ilin iyul ayında, tarixi Vaşinqton Sammitindən cəmi bir ay əvvəl məhz burada baş tutmuşdur. Əziz qardaşımız Şeyx Məhəmmədin dəstəyi ilə sülhün bərqərar olunması üçün son razılığa burada gəldik və həmin razılıq daha sonra Vaşinqtonda rəsmiləşdirilmişdir.”
Dövlət başçısı çıxışının sonunda onu bu nüfuzlu mükafata layiq görənlərə, habelə sülhün əldə olunmasında əməyi keçən bütün tərəfdaşlara bir daha dərin minnətdarlığını bildirib.

Bakıxanov qəsəbəsi, 96 nömrəli tam orta ümumtəhsil məktəbinin
direktoru Mehriban Hacıyeva