Adəm İsmayıl Bakuvi: "Prezidentin Əbu-Dabidən göndərdiyi siyasi mesajlar qlobal sülh gündəliyinin nəzəri doqmalardan praktiki müstəviyə keçidinə unikal imkanlar açır"

Azərbaycan Respublikasının son illərdə reallaşdırdığı çoxşaxəli və tarazlaşdırılmış xarici siyasət kursu ölkəmizin beynəlxalq münasibətlər sistemində etibarlı tərəfdaş və prinsipial mövqeyə malik siyasi aktor kimi mövqeyini xeyli gücləndirib. Bu siyasətin mühüm istiqamətlərindən biri də ərəb dünyası ilə əlaqələrin yeni siyasi çalarlarla zənginləşdirilməsidir. Bu baxımdan Birləşmiş Ərəb Əmirlikləri ilə münasibətlər xüsusi strateji əhəmiyyət daşıyır.

Bu sözləri aia.az-a verdiyi açıqlamasında Vəhdət Partiyasının sədri, ictimai-siyasi xadim Adəm İsmayıl Bakuvi deyib.

Fikirlərini davam etdirən partiya sədri bildirib ki, Cənab Prezident İlham Əliyevin rəhbərliyi ilə həyata keçirilən xarici siyasət xətti Azərbaycan–BƏƏ əlaqələrini ənənəvi diplomatik münasibətlər müstəvisindən çıxararaq strateji tərəfdaşlıq səviyyəsinə yüksəldib. Son illərdə qarşılıqlı səfərlərin artması, ali səviyyəli siyasi dialoqun davamlı xarakter alması və əldə olunmuş razılaşmaların əməli müstəvidə icrası bu əməkdaşlığın planlı və uzunmüddətli strategiyaya əsaslandığını göstərir. Cənab Prezident İlham Əliyevin fevralın 2-dən etibarən Birləşmiş Ərəb Əmirliklərinə etdiyi işgüzar səfər də bu strateji kursun məntiqi davamı kimi qiymətləndirilməlidir. Əbu-Dabidə keçirilən yüksək səviyyəli görüşlər zamanı münasibətlərin təkcə iqtisadi deyil, siyasi, təhlükəsizlik və regional əməkdaşlıq sahələrində də inkişaf etdiyi xüsusi vurğulanıb. Azərbaycanın regional və qlobal proseslərdə artan nüfuzu, BƏƏ-nin isə Yaxın Şərqdə sabitləşdirici rol oynaması bu tərəfdaşlığın geosiyasi əhəmiyyətini daha da artırır.

Adəm İsmayıl Bakuvi bildirib ki, səfər çərçivəsində Cənab Prezident İlham Əliyevin Əbu-Dabidə təşkil olunan “Zayed İnsan Qardaşlığı Mükafatı”nın təqdimetmə mərasimində iştirakı da xüsusi rəmzi və ideoloji məna daşıyıb. Bu mərasim iki ölkə arasında münasibətlərin yalnız siyasi və iqtisadi maraqlarla məhdudlaşmadığını, eyni zamanda humanizm, multikulturalizm, qarşılıqlı anlaşma və sülh kimi ümumbəşəri dəyərlərə söykəndiyini nümayiş etdirib. Azərbaycanın müxtəlif sivilizasiyalar arasında dialoq platforması kimi təqdim olunması Prezident İlham Əliyevin rəhbərliyi ilə yürüdülən xarici siyasətin mənəvi sütunlarının beynəlxalq aləmdə qəbul olunduğunu göstərir. Qeyd edilməlidir ki, Azərbaycan–BƏƏ münasibətlərinin əsası 1992-ci ildə qoyulsa da, bu əlaqələrin siyasi məzmununun güclənməsi Ulu Öndər Heydər Əliyevin hakimiyyətə qayıdışından sonra daha sürətlə inkişaf edib. Qarşılıqlı hörmətə və dövlət suverenliyinə əsaslanan münasibətlər beynəlxalq təşkilatlar çərçivəsində, xüsusilə BMT və İslam Əməkdaşlıq Təşkilatında qarşılıqlı dəstək müstəvisində özünü göstərib. Bu siyasi etimad bu gün də Prezident İlham Əliyevin liderliyi ilə daha da möhkəmləndirilir. Enerji sahəsində əməkdaşlıq Azərbaycan–BƏƏ münasibətlərinin əsas dayaqlarından biri olaraq qalır. Bununla belə, bu əməkdaşlıq artıq yalnız iqtisadi çərçivə ilə məhdudlaşmır, siyasi və strateji mahiyyət daşıyır. Azərbaycanın Avropanın enerji təhlükəsizliyinə verdiyi töhfələr, həmçinin yaşıl enerji istiqamətində atdığı addımlar ölkəmizi qlobal enerji diplomatiyasının aparıcı iştirakçılarından birinə çevirib. COP29-un Azərbaycanda keçirilməsi ilə bağlı qərarın məhz BƏƏ-də qəbul olunması da iki ölkə arasında formalaşmış yüksək etimadın bariz nümunəsidir.

Sonda Adəm İsmayıl Bakuvi qeyd edib ki, hüquqi və institusional baza da tərəfdaşlığın dərinləşdirilməsində mühüm rol oynayır. Cənab Prezident İlham Əliyevin səfəri zamanı imzalanmış sənədlər, o cümlədən “Cənub Qaz Dəhlizi” ilə bağlı razılaşmalar və müdafiə sahəsində əməkdaşlıq niyyətləri münasibətlərin təhlükəsizlik aspektində yeni mərhələyə qədəm qoyduğunu göstərir. Bu addımlar regionda sabitliyin möhkəmlənməsinə və qarşılıqlı maraqlara əsaslanan təhlükəsizlik mühitinin formalaşmasına xidmət edir. Səfər çərçivəsində keçirilən “Sülh Qalxanı – 2026” birgə hərbi təlimi isə hər iki ölkənin terrorizmə və digər təhlükəsizlik çağırışlarına qarşı birgə mövqedən çıxış etdiyini nümayiş etdirib. Səfərin diqqət çəkən məqamlarından biri də cənab Prezident İlham Əliyevin Ermənistanın baş naziri ilə keçirdiyi görüş olub. Azərbaycanın sülh təşəbbüslərinə sadiqliyi, normallaşma prosesinin məhz ikitərəfli əsasda və real nəticələr üzərində qurulmasına üstünlük verməsi bir daha təsdiqlənib. Bu, ölkəmizin regional liderlik rolunun və məsuliyyətli siyasi yanaşmasının göstəricisidir. Beləliklə, Azərbaycan–BƏƏ strateji tərəfdaşlığı təkcə ikitərəfli münasibətlərin inkişafı baxımından deyil, həm də regional sabitliyin möhkəmləndirilməsi, qlobal əməkdaşlığın genişləndirilməsi və yeni siyasi konfiqurasiyaların formalaşdırılması baxımından mühüm nümunə kimi çıxış edir. Cənab Prezident İlham Əliyevin siyasi iradəsi və prinsipial mövqeyi bu əməkdaşlığın uzunmüddətli və dayanıqlı xarakter almasını təmin edir – deyə, Adəm İsmayıl Bakuvi fikirlərini tamamlayıb.