Zaur Tarıverdiyev: Heç kim bizimlə diktat və ultimatum dilində danışa bilməz
Siyasət
{short-story limit="840"}
Sumqayıt maşın bazarının müdiri Zaur Tarıverdiyev - Sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsinin sıradan çıxması və mülki şəxslərin həlak olması işğalçı dövlətin ölkəmizə qarşı apardığı məqsədyönlü və planlı terror siyasətinin davamı kimi dəyərləndirildi. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsinin də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbi qulluqçularımız həlak oldu və yaralandı. Reallıq budur ki, 10 noyabr 2020-ci ildə imzalanmış üçtərəfli Bəyanatın müddəalarına zidd olaraq Azərbaycanın Qarabağ bölgəsindəki Ermənistan silahlı qüvvələrinin birləşmələrinin mövcudluğunu davam etdirməsi regional sülh və sabitlik üçün ciddi təhlükə mənbəyidir. Azərbaycan dövləti bunu ən yüksək tribunalardan bəyan edir. Ermənistanın üçtərəfli Bəyanatdan irəli gələn öhdəliklərini üç ilə yaxın dövrdə yerinə yetirmək barədə düşünməməsi, yalnız təxribatları ilə diqqətdə olması dünyanı narahat etmir. Regionda dayanıqlı sülhün və təhlükəsizliyin təmin olunmasında maraqlı olan Azərbaycanın tarixi Zəfərimizdən sonra atdığı addımlaraın xronologiyasına diqqət yetirmək kifayədir. Ölkəmiz Zəfərimizdən dərhal sonra Ermənistana beynəlxalq hüququn 5 əsas prinsipini özündə ehtiva edən sülh müqaviləsini təklif etdi. Qarşı tərəf bununla bağlı müxtəlif formatlarda və məkanlarda keçirilən görüşlərdə həmin prinsipləri dəstəklədiyini, Azərbaycanın ərazi bütövlüyünü tanıdığını bildirsə də əməldə fərqli yanaşma nümayiş etdirir. Açıq-aşkar sülh müqaviləsinin imzalanmasında maraqlı olmadığını nümayiş etdirir. Törətdiyi təxribatlar, həmçinin “humanitar böhran” adı altında məqsədli planını həyata keçirmək istəyi də bunun bariz nümunəsidir.
44 günlük İkinci Qarabağ müharibəsində olduğu kimi, lokal antiterror tədbirlərinin də uğurla başa çatdırılması üçün Azərbaycan Ordusu peşəkarlıq, yüksəh döyüş təcrübəsi nümayiş etdirdi. Dövlət başçısı İlham Əliyev sentyabrın 20-də xalqa müraciətində bildirdi ki, antiterror tədbirləri nəticəsində hərbçilərimiz böyük qəhrəmanlıq, şücaət, peşəkarlıq göstərmişlər. Ağır relyef, düşmən tərəfindən uzun illər böyük mühəndislik işləri nəticəsində istehkamların mövcudluğu şəraitində, düşmən mövqelərinin təpələrdə, əlverişli yerlərdə yerləşdirilməsinə baxmayaraq, bizim hərbçilərimiz bir daha qeyd etdiyim kimi, qəhrəmanlıq, peşəkarlıq göstərmişlər və qısa müddət ərzində bütün istiqamətlər üzrə əhəmiyyətli dərəcədə hərbi uğurlar əldə etmişlər. Ermənistan dövlətinin Azərbaycan ərazisində qanunsuz yerləşdirilmiş və öhdəliyinə baxmayaraq, bu günə qədər çıxarılmamış ordunun böyük hissəsi tamamilə məhv edilmişdir.
Antiterror tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarıldı. Əvvəlcədən verilən tapşırıqlara əsasən Ordumuz tərəfindən mülki əhali və infrastruktur obyektləri hədəfə alınmadı, yalnız legitim hərbi hədəflər sıradan çıxarıldı. Qeyd edək ki, Ordumuz bu mövqeni 44 günlük İkinci Qarabağ müharibəsi dövründə də nümayiş etdirmişdir. Azərbaycan Ordusundan fərqli olaraq isə Ermənistan silahlı qüvvələri cəbhə xəttindən uzaqda yerləşən ərazilərimizi raket atəşinə tutdu, mülki əhalinin həlak olmasına və yaralanmasına səbəb oldular. Dünya isə bunları görməzdən gəldi. Hər zaman vurğulandığı kimi, 30 illik işğal dövründə Ermənistana beynəlxalq hüququn norma və prinsiplərinə məhəl qoymadığı, BMT qətnamələrini icra etmədiyi üçün sanksiyalar tətbiq olunsaydı 44 günlük İkinci Qarabağ müharibəsi yaşanmazdı.
Ermənistan və ona havadarlıq edən dövlətlər lokal antiterror tədbirlərinin uğurla başa çatdıran Azərbaycan Ordusunun hansı imkanlara malik olduğunun bir daha şahidinə çevrildilər. Azərbaycanın haqlı mövqeyini özündə əks etdirən şərtlər qısa zamanda, bir gündə qəbul edildi. Bir gün ərzində yazılan uğur hekayəsi bir daha təsdiqlədi ki, işğalçı dövlətin istənilən təxribatına layiqli cavab veriləcək.
Dövlət başçısı İlham Əliyev postmünaqişə dövrünün reallıqları əsasında bir daha belə bir çağırışı səsləndirdi ki, bizə xor baxanlar, torpağımıza göz dikənlər, uğurumuzu həzm edə bilməyənlər heç vaxt, heç vaxt unutmasınlar ki, “dəmir yumruq” yerindədir və hər zaman yerində olacaq! Heç kim bizimlə diktat və ultimatum dilində danışa bilməz! Bunu heç kim unutmasın! Onu da unutmasın ki, Qarabağ Azərbaycandır!
