SOCAR "Azəriqaz" İB-nin ekologiyanın qorunmasına dair gördüyü işlər müzakirə olunub

2010-cu ildən etibarən 12 il ərzində SOCAR “Azəriqaz” İB qaz təchizatındakı itkilərin həcminin 6 dəfəyə qədər azalmasına nail olub. Bu haqda SOCAR-ın Ekologiya üzrə vitse-prezidenti Rəfiqə Hüseynzadənin başçılıq etdiyi nümayəndə heyəti ilə “Azəriqaz” İB-nin baş direktoru Ruslan Əliyev və Birliyin rəhbər şəxsləri arasında keçirilən görüşdə məlumat verilib. Son 12 il ərzində atmosferə atılan metan emissiyalarının azaldılması istiqamətində SOCAR “Azəriqaz” İB-nin atdığı addımlar və həyata keçirdiyi layihələrdən danışan qurumun baş direktoru Ruslan Əliyev qarşıda duran vəzifə və planlar haqqında ətraflı məlumat verərək bir sıra təkliflər də edib. SOCAR-ın Ekologiya üzrə vitse-prezidenti Rəfiqə Hüseynzadə görülən işlər və gələcək planlarla tanış olduqdan sonra əldə olunan müsbət göstəriciləri yüksək qiymətləndirib, həmçinin edilən təkliflərin qısa zamanda rəhbərlik qarşısında qaldırılacağını qeyd edib. Sonda səslənən fikirlər barədə vitse-prezident Rəfiqə Hüseynzadə tabeliyində olan məsul şəxslərə öz tapşırıqlarını verib.

SOCAR "Azəriqaz" İB-nin baş direktoru Salyan rayonunda vətəndaş qəbulu keçirib

Ölkə başçısının vətəndaşların şəhər və rayonlarda qəbulunun keçirilməsinə dair tapşırığına uyğun olaraq SOCAR "Azəriqaz" İstehsalat Birliyinin baş direktoru Ruslan Əliyev Salyan rayonunda vətəndaşları qəbul edib. Görüşdə Salyan sakinləri ilə yanaşı, Biləsuvar, Neftçala, Şirvan, Sabirabad rayonlarından olan vətəndaşların da qaz təsərrüfatına dair problem və təklifləri dinlənilib.
Müraciətlər zamanı fərdi qazlaşma, küçə qaz xəttinin çəkilməsi, sonradan ödənişli (mexaniki tipli) sayğacın əvvəlcədən ödənişli (smart-kart tipli) sayğacla əvəz edilməsi və digər məsələlərə toxunulub. SOCAR "Azəriqaz" İB-nin baş direktoru Ruslan Əliyev qəbula üz tutan 35-dək vətəndaşı fərdi olaraq dinləyib və qaldırılan məsələlərin həlli barədə Salyan Regional qaz istismarı İdarəsinin rəhbərliyinə müvafiq tapşırıq verib. Vətəndaşların qəbul zamanı qaldırdıqları məsələlərin bir qismi yerindəcə həllini tapıb. Görüş iştirakçıları bölgələrdə qəbulla bağlı göstərdiyi diqqət və qayğıya görə ölkə başçısına və SOCAR rəhbərliyinə təşəkkür ediblər.


 

“Açıq mikrofon” aksiyası həftəlik işinə Lənkəran şəhərindən başladı

Vətəndaş məmnunluğunu təmin etmək məqsədilə SOCAR “Azəriqaz” İB-nin bölgələrdə təşkil etdiyi “Açıq mikrofon” aksiyası davam edir. “Səyyar qəbul otağı”nda həftənin ilk müraciətləri Lənkəran şəhərinin sakinləri tərəfindən səsləndirilib. Aksiya iştirakçılarının ünvanladığı istək və xahişlər arasında qaz xəttinin yerinin dəyişdirilməsi, sonradan ödənişli (mexaniki tipli) qaz sayğacının öncədən ödənişli (smart-kart tipli) qaz sayğacı ilə əvəz edilməsi və debitor borcun hissələrlə ödənilməsinə güzəşt olunması kimi məsələlər yer alıb. Lənkəran şəhər sakini Samit Miriyev 10 ildən artıqdır ki, yeni inşa edilmiş çoxmərtəbəli yaşayış binasında ev aldığını, lakin bu günə kimi binanın təbii qazla təmin edilmədiyini bildirib. Lənkəran Regional qaz istismarı İdarəsinin rəhbər şəxsləri vətəndaşa bununla bağlı ətraflı məlumat verərək üzləşdiyi problemin hansı səbəbdən qaynaqlandığını izah ediblər. Hər bir müraciət Birliyin Lənkəran RQİİ-nin məsul şəxsləri tərəfindən cavablandırılıb. Bəzi müraciətlərin araşdırılmasına dair tapşırıq verilib.

Şəhid ailələrinin Birliyə etdiyi müraciət həllini tapdı

Tovuzun Vətən müharibəsi şəhidləri Məhəmməd Məmmədovla Elşən Məmmədovun ailə üzvlərinin SOCAR “Azəriqaz” İstehsalat Birliyinə etdiyi müraciətləri qısa zaman ərzində həllini tapıb. Şəhid Məhəmmədin həyat yoldaşı Yanıqpəyə kənd sakini Aidə Heydərovanın istəyi əsasında fərdi yaşayış evi qazlaşdırılaraq qaz sayğacı quraşdırılıb. Qazıqulu kənd sakini Aytəkin Məmmədovanın müraciəti isə həyat yoldaşı Elşənin xatirəsinin əbədiləşdirildiyi şəhid bulağının qarşısından keçən qaz xəttinin yerinin dəyişdirilməsindən ibarət olub. Şəmkir Regional qaz istismarı İdarəsi tərəfindən şəhid ailəsinin bu istəyi yerinə yetirilib.