Həmid Həsənov: Uğurlu kadr islahatları idarəetmədə səmərəliliyi artırır

Xaçmaz Rayon Polis Şöbəsinin rəisi, polis polkovniki Həmid Həsənov - Prezident İlham Əliyev tərəfindən həyata keçirilən məqsədyönlü siyasət çərçivəsində struktur və kadr islahatları da xüsusi əhəmiyyət kəsb edir. Ona görə ki, məhz  idarəetmədə səmərəliliyi artırmaq məqsədilə islahatlar həmin sahəni də əhatə edib. Prezident tərəfindən qarşıya qoyulan iqtisadi, sosial məsələlərə nail olmaq məqsədilə idarəetmə sahəsində də yeni yanaşmanın tətbiqi mühüm məsələ olub. Belə uğurlu islahatların davamı kimi son illər ərzində  struktur islahatları dərinləşdi və kadr dəyişikliklərinə başlandı. Sevindirici haldır ki, hazırda Azərbaycanda geniş və çoxşaxəli islahatlar proqramı dövlətimizin başçısı tərəfindən çox böyük uğurla həyata keçirilir. Bütün uğurlu inkişaf fonunda müşahidə etsək görərik ki,  müdrik siyasətimiz xalqımız tərəfindən tam şəkildə dəstəklənir.
Müasir müstəqil Azərbaycanın qurucusu Heydər Əliyevin əsasını qoyduğu dövlət idarəçiliyi, daxili və xarici siyasət kursu Prezident İlham Əliyevin rəhbərliyi altında çox böyük nailiyyətlərlə davam edir. Ümumilikdə sosial-iqtisadi inkişaf strategiyası, iqtisadiyyatın dinamik templi inkişafı, xalqın rifah halının daha da yaxşılaşdırılması siyasətinin bundan sonra da həyata keçirilməsi daha geniş hədəflərin müəyyənləşməsini və daha dərin islahatların aparılmasını zərurətə çevirir.
Bir neçə gün öncə Prezident tərəfindən Göygöl, Lerik və Masallı rayonlarına icra başçıları vəzifəsinə təyinat zamanı dövlət başçısı xüsusi məqamlara toxunmuş, eyni zamanda məmurların öz vəzifə borclarını vicdanla, düzgün icra etməsi istiqamətində ciddi tapşırıqlar verilib. Azərbaycanın uğurlu inkişafını geniş və məzmunlu çıxışında diqqətə çatdıran Prezident qeyd etdi ki, son illərdə bütün rayonlarda regionların sosial-iqtisadi inkişafı Dövlət Proqramını icrası nəticəsində geniş abadlıq-quruculuq işləri görülüb, böyük infrastruktur layihələri icra edilib və uzun illər ərzində insanları narahat edən problemlərin böyük hissəsi aradan qalxıb: “İş yerlərinin yaradılması xüsusi əhəmiyyət kəsb edir. Çünki ölkə əhalisi artır. Azərbaycan müstəqilliyə qovuşanda əhalimiz 7 milyondan bir qədər çox idisə, bu gün 10 milyondan çoxdur. Bu, təbii olaraq tələb edir ki, iş yerlərinin açılması prosesi daimi xarakter alsın. Mən bütün icra başçılarını vəzifəyə təyin edərkən göstərişlərimdən biri o idi ki, korrupsiyaya, rüşvətxorluğa qarşı biz amansız mübarizə aparmalıyıq və icra başçıları burada nümunə olmalıdır. Şəhid ailələrinə xüsusi diqqət göstərilməlidir. Dövlət tərəfindən bu diqqət daim göstərilir. İkinci Qarabağ müharibəsindən əvvəl və İkinci Qarabağ müharibəsindən sonra şəhid ailələri daim diqqət mərkəzindədir. Bilirsiniz ki, mənim şəhid ailələri, müharibə əlilləri ilə çoxsaylı görüşlərim olub. Onların məişət problemləri dövlət xətti ilə həll olunur, 12 min 500-dən çox şəhid ailəsinə dövlət tərəfindən mənzillər, fərdi evlər verilib, minlərlə minik maşınları verilib. Bu proses davam etdirilir. Azərbaycanın çox böyük perspektivləri var, çox böyük potensialı var, xüsusilə İkinci Qarabağ müharibəsindəki tarixi Zəfərimizdən sonra ki, biz bu ədalətsizliyə də son qoyduq, öz gücümüzlə tarixi ədaləti bərpa etdik. Biz müzəffər xalq kimi yaşayırıq, ləyaqətlə yaşayırıq və ölkəmizdə işlər elə getməlidir ki, heç bir narahatedici problem olmasın, heç bir ədalətsizlik olmasın”.
Qürur hissi ilə söyləyə bilərik ki, Azərbaycan bu gün beynəlxalq aləmdə çox böyük hörmətə və nüfuza malik olan bir ölkədir. Çünki Prezidentin rəhbərliyi altında həyata keçirilən və Azərbaycanı inkişafın pik həddinə çatdıran düzgün və məqsədyönlü siyasətimiz ədalət prinsipinə əsaslanaraq, xalqımızın maraqlarına xidmət edir.  


Azərbaycan həm siyasi, həm də iqtisadi cəhətdən müstəqil və dinamik inkişaf edən bir dövlətdir. Xüsusilə ölkəmizin iqtisadi inkişafının bariz təzahürlərini son illər respublikanın rayon və bölgələrində gedən mütərəqqi proseslərdə, o cümlədən həyata keçirilən abadlıq-quruculuq işlərində, insanların rifahının yüksəlişində müşahidə edə bilirik. İşğaldan azad edilmiş ərazilərin potensialı ölkə iqtisadiyyatının ümumi inkişafına böyük töhfələr verəcək və Azərbaycan daha güclü, daha zəngin olacaq. Bu gün isə həmin ərazilərdə bərpa-quruculuq işləri həyata keçirilir. Əminliklə demək olar ki, ən qısa zamanda Şərqi Zəngəzur və Qarabağ iqtisadi rayonlarına aid olan bölgələrimiz də ölkənin digər regionları kimi, sürətli inkişaf yoluna qədəm qoyacaqlar.

Qeyd olunmalıdır ki, son illər respublikanın rayon və bölgələrində gedən dinamik inkişaf ilk növbədə uğurla həyata keçirilən regionların sosial-iqtisadi inkişafına dair Dövlət Proqramının nəticəsidir. Məhz bu proqramın icrası sayəsində son illər ərzində bütün rayonlarımızda böyük abadlıq-quruculuq işləri aparılıb, irimiqyaslı infrastruktur layihələri həyata keçirilib, uzun illərdən bəri insanları narahat edən sosial-məişət və digər problemlər aradan qaldırılıb. Həmçinin bu illər ərzində rayon və kəndlərimizdə elektrik təchizatı, qazlaşdırma, içməli su, yol infrastrukturu, rabitə və digər bu kimi sahələrdə önəmli layihələr həyata keçirilib. Bütün rayonlarda yeni xəstəxanalar, məktəblər, idman kompleksləri inşa olunub, parklar salınıb.

Həmçinin regionların sosial-iqtisadi inkişafı Dövlət Proqramının uğurlu icrası nəticəsində rayon və bölgələrdə işsizlik probleminin həlli ilə bağlı əhəmiyyətli addımlar atılıb. Bu baxımdan təbii ki, ölkədə sahibkarlığın inkişafına dövlət tərəfindən göstərilən qayğı və diqqət əhəmiyyətli rol oynayır. Prezident İlham Əliyev iyulun 25-də Masallı, Lerik və Göygöl Rayon İcra Hakimiyyətlərinin yeni başçılarını vəzifələrinə təyin olunmaları ilə əlaqədar qəbul edərkən bu məsələyə xüsusi olaraq toxundu və bildirdi ki, rayon və bölgələrə sahibkarlar cəlb olunmalıdırlar. Dövlət başçısı bu məqsədlə yeni təyin olunmuş icra hakimiyyəti başçılarını daha aktiv olmağa, sahibkarlığın inkişafı üçün mövcud şəraiti daha əlverişli etməyə çağırdı.

Təbii ki, Prezidentin çıxışında vətəndaşlara və ilk növbədə şəhid ailələrinə, qazilərə və müharibə iştirakçılarına diqqət və qayğı göstərilməsi məsələsi xüsusi olaraq vurğulandı. Dövlət başçısı bir daha qeyd etdi ki, azad edilmiş torpaqlarımıza bayrağımızı sancan bizim qəhrəman əsgər və zabitlərimiz olub. Onlar öz canlarını fəda edib, sağlamlığını itirib, heç nəyə baxmadan, qorxmadan ölümə gedərək Vətənimizi işğalçılardan xilas ediblər və bunu heç kimin unutmağa haqqı yoxdur. Buna görə də hər bir dövlət məmurunun, hər bir vətəndaşın borcudur ki, onlara arxa, dayaq olsun. Həqiqətən də bu gün Azərbaycan dövləti şəhid ailələrinə, qazilərə və müharibə veteranlarına böyük diqqət və qayğı göstərməkdədir. Bu kateqoriyaya aid olan insanların məişət problemləri dövlət xətti ilə həll olunur. Şəhid ailələrinə dövlət tərəfindən mənzillərin, fərdi evlərin, minik maşınlarının verilməsi prosesi indi də davam etdirilir. Şəhid ailələrini, müharibə əlillərini işlə təmin etmək üçün çoxsaylı tədbirlər həyata keçirilir. Əlbəttə ki, rayon icra orqanlarının nümayəndələri də bu kateqoriyadan olan insanlara qayğı göstərilməsini hər zaman diqqətdə saxlamalı, onların problemləri ilə maraqlanmalı, məişət şəraitlərinin daha da yaxşılaşdırılmasında onlara dəstək olmalıdırlar. Bu gün Azərbaycan qalib ölkə, Azərbaycan xalqı isə qalib xalqdır! Bu qürur və şərəfi bizə bəxş edən insanlara qayğı da bizim hamımızın borcudur.