Ağçay kəndinin sakinləri ilə növbəti səyyar görüş keçirilmişdir

Ağçay kəndində 9 iyul 2022-ci il tarixində Azərbaycan Respublikasının Prezidenti cənab İlham Əliyevin tapşırığına uyğun olaraq rayon İcra Hakimiyyətinin başçısı Musa Şəkiliyevin səyyar qəbulu-görüşü keçirilmişdir.
Rayonun hüquq-mühafizə orqanları və aidiyyəti qurumlarının rəhbərlərinin iştirakı ilə keçirilən qəbulda vətəndaşlar tərəfindən müraciətlər dinlənilmişdir. Müraciətlər Ağçay kənd ümumi orta məktəbinə telefon və internet xəttinin çəkilməsinə, kəndin daxilindən axan çayın beton kanalına alınmasına, kənd uşaq bağçasının telefon xəttində yaranan nasazlığın aradan qaldırılmasına və vətəndaşın qonşusu tərəfindən aparılan qeyri-qanuni tikilinin sökülməsinə köməklik göstərilməsi ilə bağlı olmuşdur.
Qəbulda iştirak edən vətəndaşların müraciətləri dinlənilmiş, qaldırılan məsələlərin həlli ilə bağlı aidiyyəti qurumlara müvafiq tapşırıq və tövsiyələr verilmişdir. Sonda vətən müharibəsi iştirakçıları ilə görüş təşkil olunmuşdur.

Rayonda şəhidlərin xatirəsi anılıb

Birinci Qarabağ müharibəsində igidliyi ilə tarix yazan qəhrəman oğullardan biri də Qax rayonunun Qaşqaçay kəndindən olan Azərbaycanın Milli Qəhrəmanı Cavanşir Rəhimovdur. Avqustun 6-sı Cavanşirin şəhadətə yüksəlməsinin 30 ili tamam oldu.
Ərazi bütövlüyümüz uğrunda canını qurban verən qəhrəman Vətən oğlunun şəhidlik zirvəsinə yüksəlməsinin ildönümü ilə əlaqədar avqustun 6-da Qax şəhərindəki Şəhidlər xiyabanında anım tədbiri keçirilib. Tədbirdə Qax Rayon İcra Hakimiyyətinin, YAP Qax rayon təşkilatının rəhbər şəxsləri, Səfərbərlik və Hərbi Xidmətə Çağırış üzrə Dövlət Xidmətinin rayon bölməsinin əməkdaşları, şəhidin ailə üzvləri, yaxınları, döyüş yoldaşları, ictimaiyyətin nümayəndələri iştirak ediblər.
Tədbir iştirakçıları əvvəlcə xiyabanda uyuyan şəhidlərin məzarlarını ziyarət edərək üzərinə gül dəstələri düzüb, xatirəsini ehtiramla yad edib, ruhlarına dualar oxuyublar.
Mərasimdə rayon İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Vəfa Heydərova, YAP Qax rayon təşkilatının sədri Natiq Allahverdiyev, Vətən Müharibəsi Qəhrəmanı İzzət Balacayev və başqaları çıxış edərək, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Zəfərlə başa çatan 44 günlük Vətən müharibəsində qazanılan şanlı Qələbədən danışıb, Azərbaycanın Milli Qəhrəmanı Cavanşir Rəhimovun döyüş yolundan, mübarizliyindən söz açıb, şəhidlərin əziz xatirəsinin heç bir zaman unudulmayacağını vurğulayıblar.
Milli Qəhrəmanın anası Lalə xanım çıxış edərək, Vətən uğrunda canını qurban verən igid övladı ilə hər zaman qürur duyduğunu bildirib, onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlığını bildirib.
Anım tədbiri daha sonra qəhrəmanın doğulduğu Qaşqaçay kəndində davam etdirilib.
Cavanşir Rəhimov 1973-cü il iyunun 5-də Qax rayonunun Qaşqaçay kəndində anadan olub. Uşaq yaşlarında olarkən ailəsi Bakının Qaraçuxur qəsəbəsinə köçüb. Suraxanı rayonundakı 104 saylı orta məktəbdə təhsil alan Cavanşir karate idman növünə maraq göstərib, idman ustası normativini ödəyib. 1992-ci ildə hərbi xidmətə çağırılan Cavanşirin taleyinə yenicə yaranmağa başlayan Azərbaycan Hərbi Hava Qüvvələrində xidmət etmək düşüb. O, hərbi vertolyotun bort atıcısı kimi torpaqlarımızın işğaldan azad edilməsi uğrunda gedən döyüşlərdə iştirak edib, sərrast atəşlə düşmənin xeyli canlı qüvvəsini məhv edib. 1992-ci il avqustun 6-da növbəti döyüş tapşırığını yerinə yetirərkən qəhrəmancasına həlak olub.
Azərbaycan Respublikası Prezidentinin 1994-cü il 16 sentyabr tarixli Fərmanı ilə Cavanşir Rəhimova ölümündən sonra “Azərbaycanın Milli Qəhrəmanı” adı verilib.
O, Azərbaycanın ən gənc Milli Qəhrəmanıdır. Bakı şəhərində Şəhidlər xiyabanında dəfn edilib. Suraxanı rayonundakı 146 saylı tam orta məktəb Cavanşir Rəhimovun adını daşıyır. Qaraçuxur qəsəbə parkında onun büstü qoyulub.

Vətənimizin bütövlüyü uğrunda şəhidlik zirvəsinə ucalan rayonumuzun mərd oğullarının anım mərasimi keçirilmişdir

Rayonda torpaqlarımızın işğaldan azad edilməsi uğrunda gedən döyüşlərdə  qəhrəmancasına döyüşərək şəhidlik zirvəsinə ucalan igid oğullarımızın doğum və anım günlərində xatirələrinin anılması, ailələrinin ziyarət olunması artıq ənənə halını almışdır.
Bu günlərdə əsgər Rəvan Bünyadlı və mayor Aqil Omarovun doğum günlərində xatirəsi yad edilib. Həmçinin keçən həftə ərzində Sahib Qadaşov və Elçin Əhmədovun şəhidlik zirvəsinə yüksəlməsinin ildönümü ilə əlaqədar anım tədbirləri keçirilmişdir.
Hər dörd şəhidin anım mərasimlərində rayon rəhbərliyi, şəhidlərin ailə üzvləri, ictimaiyyət nümayəndələri, gənclər, məktəblilər iştirak etmişlər. Şəhidlərin məzarları üzərinə gül dəstələri düzülmüş, ruhlarına dualar oxunmuş, xatirələri ehtiramla yad edilmişdir. Anım mərasimlərində şəhidlərin döyüçlərdəki  şücaətlərindən, onların şərəfli döyüş yollarından söz açılmışdır.
Ərazi bütövlüyümüzün bərpa olunması uğrunda canından keçmiş bütün şəhidlərimizə Allahdan rəhmət, qazilərimizə isə şəfa diləyirik.

Rayonda şəhid ailələri və müharibə qaziləri ilə görüş keçirilib

Torpaqlarımızın erməni işğalçılarından azad edilməsi uğrunda döyüşlərdə şəhidlik zirvəsinə ucalan qəhrəman Vətən oğullarının ailələri, eləcə də müharibə qaziləri və iştirakçıları ölkəmizin hər yerində olduğu kimi,  rayonda da diqqət və qayğı ilə əhatə olunublar. Rayonun mədəniyyət işçiləri də mütəmadi olaraq şəhid ailələrini ziyarət edir, müharibə qaziləri və iştirakçıları ilə görüşür, onlara mənəvi dəstək olurlar.
     Rayonda Mədəniyyət Mərkəzinin və  Heydər Əliyev Mərkəzinin birgə təşkilatçılığı ilə keçirilən “Ölümsüzlüyə ucalanlar” adlı tədbirdə Vətən uğrunda canlarını qurban verən qaxlı şəhidlərin ömür yolundan, vətənpərvərliyindən, döyüşlərdə göstərdiyi qəhrəmanlıqlardan söz açılıb, xatirələri ehtiramla yad edilib.
     Rayon Heydər Əliyev Mərkəzində keçirilən tədbirdə şəhid ailələrinin üzvləri, qazilər, Vətən müharibəsi iştirakçıları, rayon icra hakimiyyətinin rəsmiləri, mədəniyyət işçiləri, ictimaiyyətin nümayəndələri iştirak ediblər.
    Tədbirin əvvəlində Vətən uğrunda canlarından keçən şəhidlərin xatirəsi bir dəqiqəlik sükutla yad olunub.
    Tədbirdə rayon icra hakimiyyəti başçısının müavini Vəfa Heydərova, YAP rayon təşkilatının sədri, şəhid qardaşı Natiq Allahverdiyev, Şəki Regional Mədəniyyət İdarəsinin Qax rayonu üzrə məsləhətçisi Dilarə Əzizova, rayon Mədəniyyət Mərkəzinin direktoru Kəmalə Məcidova, rayon Heydər Əliyev Mərkəzinin direktoru Nərminə Omarova, “Şəlalə” qəzetinin redaktoru Xavər Əfəndiyeva və başqaları çıxış edərək, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Zəfərlə başa çatan 44 günlük Vətən müharibəsində qazanılan şanlı Qələbənin tarixi əhəmiyyətindən danışıb, şəhidlərimizin, qazilərin qəhrəmanlıqlarından söz açıb, ərazi bütövlüyümüz uğrunda canlarından keçən igid oğulların əziz xatirələrinin heç bir zaman unudulmayacağını vurğulayıblar.
     Şəhid Asəf Ağayevin, Anar Qarayevin ataları çıxış edərək, onlara göstərilən yüksək dövlət qayğısına görə ölkə rəhbərliyinə minnətdarlıqlarını bildirib, tədbirin təşkilatçılarına təşəkkür ediblər.
     Rayon Mədəniyyət Mərkəzinin nəzdində fəaliyyət göstərən İ.Dağıstanlı adına Xalq Teatrı aktyorlarının təqdim etdikləri “Xarı bülbül” tamaşasından parça, şəhidlərə aid videoçarxlar, şeirlər tədbir iştirakçılarına duyğulu anlar yaşadıb.