İsrail: İranın hücumu halında ABŞ əsgərlərinin köməyinə ehtiyac duymuruq

"İranın hücumu halında ABŞ-nin lazımi dəstəyi verəcəyinə əminik. Bununla belə, İsrail hərbi yardım, o cümlədən ABŞ-dən canlı qüvvə yardımına ehtiyac duymur". 

İqtisadiyyat.az xəbər verir ki, bunu İsrailin Milli Təhlükəsizlik Şurasının (MTŞ) rəhbəri Tzaçi Haneqbi deyib.

"Biz heç kimdən hərbi dəstək istəmirik, hətta ABŞ-dən də. Onların qoşunlarına ehtiyacımız yoxdur", - Haneqbi Bild qəzetinə müsahibəsində deyib.

Eyni zamanda, İsrail Milli Təhlükəsizlik Xidmətinin rəhbəri əmindir ki, İrandan hücum olacağı təqdirdə İsrail ABŞ-dən dəstək alacaq: "Əlbəttə ki, bütün bu müddət ərzində bizə çox yaxın olan ABŞ-dən dəstək alacağıq".

Haneqbi ABŞ Prezidenti Co Baydenin müharibə zamanı İsrailə səfər edən ilk Amerika Prezidenti olduğunu xatırladıb və İsrailin təhlükəsizliyinə sadiq olduğunu bildirib.

"Bizim Ağ Evlə çox yaxşı əlaqələrimiz var, Baş nazir bir neçə gün əvvəl orada idi", - deyə İsrail Milli Təhlükəsizlik Xidmətinin rəhbəri yekunlaşdırıb.